【时间：正午】

【地点：吴江路金师傅馄饨店】

“来来来，快点进来，里厢有空调，哦唷，热煞了。

“喏喏，牌子挂勒格搭呀，侬看，侬好好交看，随便侬要吃点啥，我今朝钞票带了该。

“侬讲啥？叫阿拉快点啊？滑稽伐，看牌子有啥好催个啦，十分钟廿分钟侬管我啊。

“侬排骨年糕有勿啦？唔没。格末好唻，否则阿拉老早点好唻。

“啥么事？倷是馄饨店？现在啥人家勿是样样卖？

“好了好了，勿搭侬争，格末就两碗菜肉馄饨，七块头格，勿是七块五，也勿是八块头格。格爿店里样样啥侪没格。

“哎，我问倷，倷一碗馄饨有几只啊？10只啊？10只侬吃得饱伐啦？

“我来付我来付，侬去抢位置，啥？里厢老空个？哎呀，我叫侬去抢只风凉点个位置呀，喏，角落头有电风扇。

（等待时之闲话删去5000字）

“哦唷妈哎，总算来了。慢慢慢，小姑娘，倷哪能香菜摆介少个啦？哦唷，香菜啊勿舍得摆，葱花也一瓣也唔没，倷迭个啥店啊。

“哦唷，香菜一样加么多加点呀，作孽叭啦。慢慢慢，还有唻，我搭侬讲馄饨要宽汤要宽汤，侬看，介一点点汤，去，帮我倒碗开水来，快点。

“哎呀，勿要侪倒了我碗里，拨伊也倒一点。好了，我稍微讲慢了一步，乃末侪倒了我碗里了。去去去，再去倒碗出来。

“来来来，倒了伊碗里，啥么？侬覅？憨大，好咯，伊拉个汤咸，吃了对心脏勿好，倒点，再倒点。

“小姑娘，等歇覅忘记带两张餐巾纸来哦。”

……

阅后请猜出说话人的以下表征：

性别：？

年龄：？

籍贯：？

发型：？

眉型：？

全部猜中者有奖。